Maiatzaren 29an, asteazkena, 2023ko Caritas Gipuzkoaren memoria aurkeztu da. Ekitaldia, Donostiako Elizbarrutiko Caritasen egoitzan ospatu da.

On Fernando gotzaina ekitaldiko partaide izan da, eta “mundu ezin hobe batean Caritasek ez lukeela existitu behar” azpimarratu du, baina bere lana behar-beharrezkoa da pobrezia dagoelako. Zentzu berean, “baldin eta Caritas ez balego, sortu egin beharko litzateke” gaineratu du Fernandok.

Zentzu horretan, Memoriaren irakurketak berarengan sortzen duen sentimendu bikoitza adierazi du. Alde batetik, gizarte-bazterkeria pairatzen duten pertsonengatik “tristura sakona” (“ez dira zenbakiak, herritarrak dira”, esan du); batez ere, horietako asko “sistematik at geratzen ari direlako” eta Caritaseko atea jotzen dutelako.

Bestalde, Gipuzkoako kristau elkartearen eta, oro har, Gipuzkoako gizartearen elkartasun handia ikusteak berarengan sortzen duen poza eta harrotasuna adierazi du, Elizaren lanean konfiantza izateaz gain, hainbat proiektu finantzatzen laguntzen duelako. Era berean, boluntario talde hain handi eta leiala izatearen harrotasuna ere aipatu du gotzainak. Era berean, nabarmendu du, Elizak erakunde publikoekin duen lankidetza ona, Caritasek artatutako pertsonen zaintzara eta arretara bideratutako hainbeste proiektuetan ikusten den bezala.

Iaz, 2023 urtean, Donostiako Elizbarrutiko Caritasek bere funtsezko egitekoari eutsi zion, hau da, pobrezia-arriskuan eta/edo gizarte-bazterkeria arriskuan dauden pertsonei laguntzea; hainbat gizarte-premiari erantzutera bideratuz eta pertsonen autonomia, ongizatea eta gizarteratzea sustatuz. Memoriaren eskutik, erantzun dituen erronkak partekatzen dira.

Bere laguntza antolatzeko, Gipuzkoako Elizbarrutiko Caritasek 80 parrokia-harreraz osatutako sarea du, probintzia guztian zehar banatuak, hau da, beroa eta gertukoa izateko helburua duen arretaren sarrera direnak.

Era berean, funtsezkoa da 815 boluntarioek egin zuten lana, bai eta bazkideen eta emaileen laguntza ere. Horien ekarpena Elizaren erakunde honek aurrera eramaten dituen jarduera eta proiektuen finantzaketaren %68 da.