Astearte honetan gure Elizak Quo Commodius buldaren gauzatzearen 75. urteurrena ospatuko du; 1950eko uztailaren 1ean Donostiako Elizbarrutiaren bizitza kanonikoa martxan jarri zuen Pio XII.aren agiriak.

Quo Commodius buldak martxan jarritako istorioa

1949ko azaroaren 2an Erroman sinatutako buldak, Gasteizko Elizbarrutitik, Gipuzkoako parrokiak bereizi zituen, eta bi egoitza berri abian jarri ziren: Bilbo eta Donostia.

Gauzatzea, garai hartako nuntzio apostolikoaren esku utzi zen, eta 1950eko uztailaren 1ean gauzatu zen. Bi hilabete geroago, irailaren 3an, Elizbarrutiko lehenengo artzain izendatu zuten Jaime Font i Andreu monsinorea. Harrez gero, zazpi gotzainek gidatu dute elizbarrutia, eta gaur egun, Iruña-Tuterako Artxidiozesiaren pean egoten jarraitzen du.

Jubileu-ospakizunak

Bere Oroipena bihotzean gutun berrian, Fernando Prado Ayuso monsinoreak, zera gogorarazten du: “Munduko Jubileuaren testuinguruak, aurten, gure elizbarrutiaren 75. urteurrenarekin bat egiten du. Beraz, Jubileu-ospakizunetan murgilduta gaude”. “Iraganari esker onez eta etorkizunari itxaropenez begiratzera” gonbidatzen ditu Gotzainak fededun guztiak Jubileu Urte honetan.

Elizbarrutiak, “Jubileu bikoitza” iragan urtarrilaren 6an inauguratu zuen, Jose Tolentino de Mendonça kardenal monsinoreak, Frantzisko Aita Santuaren ordezkari berezi bezala, Ate Santua ireki zuenean. Harrezkero, erromesaldiak, elkartasun keinuak, katekesi bereziak… ospatu dira.