Argazkia: GUKA

Jose Luis Frantsesena organo-jotzaile azpeitiarrari omenaldi hunkigarria egin zioten Azkoitian iragan den larunbatean, Andre Mariaren Jasokundeko parrokian dagoen Cavaille-Coll organoaren titulartasunean 25 urte bete zituen egunean. Frantsesenak mende laurden honetan egindako ibilbidea aitortu zioten herritarrek, gertukoek, udalak eta parrokiako taldeak. Aurretik, musikariak 25. urteurreneko kontzertua eskaini zuen Mariatxen Urkia sopranoarekin batera , hasiera bateko sei abestiko egitarauari beste hiru pieza gehituz. Emanaldiak jendetza bildu zuen, eta ikus-entzuleek zutik eta txalo artean hartu zituzten bi artistak amaieran.

Omenaldi ofizialean, Ignacio Arakistain eta Xabier Arana organo-jotzaile gazteek beren maisuari aitortza egin zioten. Ondoren, Felix Azurmendi parrokoak Frantsesenak kristau elkarteari egindako ekarpena eta gazteekin egindako maisu lana nabarmendu zituen. Ana Azkoitia alkateak, berriz, musikariaren “eskuzabaltasuna eta maisutasuna” goraipatu zituen, bereziki “Cavaille-Coll handia” ondare gisa zaindu eta zabaltzeagatik. Alkateak Azpeitiarrak herriari eman dion musika oparia azpimarratu zuen, eta “zilarrezko ezteiak” ospatzen dituzten bikote onaren parean jarri zituen Frantsesena eta organoa. Ekitaldia Antton Aranbururen bertso batek borobildu zuen.