San Juan elizako Cavaillé-Coll organoak 145 urte bete ditu aurten. Hori ospatzeko, organista titularrak parrokiarekin batera lehenengo Organo Jaialdia antolatu du, herrian dagoen instrumentuaren balioa ezagutarazteko. Datozen hilabeteetan lau kontzertu izango dira, guztiak sarrera librearekin, eta bertan organista eta musikari onenetako batzuk arituko dira.

‘Udazkena Musikaz’ izena jarri dioten jaialdia joan den larunbatean hasi zen, Mikel Maniega eta Oier Gastonen kontzertuarekin.

Hurrengo emanaldia urriaren 24an izango da, larunbata, Juncal Baroja sopranoaren eta Gerardo Rifón organistaren eskutik. Azken bi kontzertuak azaroan izango dira. Hilaren 6an, ostiralean, Juan de la Rubiak organo kontzertua eskainiko du bakarka. Musikari katalana Bartzelonako Familia Santuaren Basilikako organista da. Lehen ziklo honi amaiera emateko, Matias Sagrerasek Ensemble 16 ‘abesbatzarekin joko du azaroaren 14an.

Udazkena Musikaz ‘zikloa parrokia-elizako organoaz gozatzeko aukera paregabea izango da. Instrumentua Cavaillé-Coll etxe frantsesak eraiki zuen eta Jose Manuel Lopetegui Iraragorri jaunak eman zion parrokiari 1881ean. «Parisen Notre Damekoa eraiki zuen etxe berekoa da. Organo hau edukitzea altxor handia da», adierazi du Gastonek, eta gaineratu du jaialdi hau bere potentzia gorenean entzuteko beste aukera bat izango dela.